رغم الزحام

رغم الزحام

أنا باكتب شعرى

من إحساسى..

من نبض عروقى

من قلبى المتلغمط

بحنين القلب التانى

من وجدانى

وبرغم الحرف الصح

وبرغم الخطأ الغير مقصود

وبرغم آهات الخلق

وبرغم حنين بيلملم كل الدنيا

وبرغم الطفل الباسم جوايا

وبرغم الحزن الأكبر منى

وبرغم الليل والصمت

وبرغم حنين الشوق والقهر

وبرغم الغربة جوه مشاعرى

برغم مشاغلى..

برغم المنطق والنظرية

برغم الزمن الزايف جدا

أنا باكتب شعرى..

لكن نفسى..

أقلع توب الطين والميه

نبقى ملايكة

وأتحرر..

م اللون الغامق

وأجعل بكرة جميل الصورة

وأنسى دموعى..

وأتحول حتة سكر

بتدوب ف عشق الروح

مع لون بيوحد نفسه

ولو أن اللون الأخضر

عنوان ملازمنى..

راسم لى وجودى..

ربيع وبريق

وبرغم .. ورغم .. ورغم

مش عارفه بكرة

حايودينى لفين..