نسيم الحنان
قصايد تروح
قصايد بتيجى
وفانى اللى يكتب
بدمه القصيدة
مشاعر وشاعر
يفجر فى صمت السكون
الكلام
يدحرج نسيم الحنان
ف الجمل
ويعشق طريق الطيور البعيدة
ويعشق ف شدو
الطيور الجمال
يشد الرحال
وخصر النخيل
بينقش ف عمره
بوشم الضياع
مشاعر وشاعر
بيرسم حياء العواصف
وتبقى اللغات بالشفايف قانون
وشاعر
يسافر بلون الحداد
ف مرسى القلق
ينادى التمرد
ويبقى خصام الزمن
للممات
وشاعر
يسهر جبين الأحبة
ف زنزانة ناعمة
ويطوى السهول
ما بين السطور
يعرى كلام الصدور
ما بين الورق
يكحل عيونه
بشوق السفر
وشاعر
يجرح ف صمت الأمانى
تغنى التمنى بنايها الحزين
حكاية ولد
بيعشق ف خوفه
بيشرب ف نخبه
ف قلبه اللى راح
وجمر القدر
بيفرد خريطة كلام الهوى
وشاعر
بيمشى ف شارع غريب
يلفه الألم
بطرف الوجع
دموع المشيب
ويأس الزمن
ف حوض المكان
وكل التاريخ
ف حالة اغتراب
وباقية السطور
وحرف الكلام
وباقى الرمل
والرجز والعروض
وفانى يا شاعر
يا مليان مشاعر
وياللى بدمك
وروحك
وقلبك
بتكتب قصيدة
وباقية القصايد
ليست هناك تعليقات:
إرسال تعليق