وشوشة البحر
لما وقفت أنا عند البحر
طبطب على كتفى وكلمنى
حاسس بيكى
عارف سرك
بصى ف لونى
خلى ف قلبك لحظة تدلك
ليه تشغلى نفسك بآلامك
وبأحوال الناس وبحالك
لما عجبنى كلامه قعدت
ومسك أيدى
طاف ويايا ف صدرى معايا
قال لى
قولى لى
فضفضى عنك
جوفى الواسع حيشيل همك
حسيت أن الفرحة بترقص
ويا الموجة اللى بتسألنى
وبتتكسر فوق أقدامى
وبتغسلنى من أحزانى
ورمت لى ع الشط هدية
جيت ألمسها أزيت ملمسها
وبتتألم
سبتها تدحرج براحتها
وتعلمنى إزاى أتبسم
وأعرف أن الفكر الواعى
عمره ما يبقى سجين أفكاره
ويصنع ويا حدوده آلامه
دلوقتى أنا أقدر أجاوب
أنى عاشقة البحر .. وصنعه
ليست هناك تعليقات:
إرسال تعليق