دايرة الجري الدنيوي
صرخ الورق
والقلم سلم من على أطراف صوابع صاحبته
تاهت معاه الأزمنة
مشهد وداع الأمكنة
شطحت رسايل يومياتى ف المحن
وانفصل كل الحوار مع سباق الزمن
سافر الشوق ف البحار
يلقى لحظة امتزاج
ف حرف إدراك ضمير
أو يوم نصير
فى سجلات الصبا
أو ف المزاج
أو وجد ف الوصل اللى فات
متنفضه عنها التراب
إعلان رهيب
متصل أو منفصل
عن موت رقيق
جوا سلة مهملات
وملاحظات عن المزاج وعن العفن
وشراب عتيق خلاصة من مخزون حياة
فيه الشفا . فيه الوفا
توقيت عقارب م البشر
توقيتات ساعة خروج
من دايرة الجرى الدنيوى
وانعدام إيقاع لحاضر
واستقالة مغرضة
انتحار تاريخ على دقات عقارب
والقلم سلم على أطراف صوابع صاحبته
والورق ماسح دموع المشكلة
ليست هناك تعليقات:
إرسال تعليق